Para Utusan 22

Irika dane Paulus mabaos sapuniki, “Duh para semeton miwah para penglingsir sareng sami! Titiang nunas, pirengin ja atur titiange buat mabela raga.” 2 Ritatkala anake akeh mirengin dane Paulus mabaos nganggen basa Ibrani, anake irika ngancan meneng. Raris dane Paulus nglanturang mabaos sapuniki, 3 “Titiang anak Yahudi. Titiang lekad ring Kota Tarsus ring Propinsi Kilikia, nanging kelih ring Kota Yerusalem. Titiang sisian dane Gamaliel lan titiang seken-seken pisan kaajahin indik pula-pali ukum leluhur iragane. Punika mawinan titiang sarat pisan mabakti kapining pateh sekadi semeton sami sane wenten iriki dinane mangkin. 4 Idumun, titiang sampun nyiksa kantos padem para anake sane ninutin Margi sane katujuin olih Sang Ratu Agung. Anake punika, lanang wiadin istri, ejuk tur celepin titiang ka krangkenge. 5  penglingsir agung lan saluirin pemimpin ring pengadilan agamane prasida ngicen kasaksian indik babaosan titiange puniki patut. Titiang pada polih surat kuasa saking pengadilan agamane mangda kaedengang kapining para semeton Yahudine ring Kota Damsik. Malantaran surat kuasane punika, titiang luas mrika jagi ngejuk anake sane ninutin margi sane katujuin olih Sang Ratu Agung mangda kabakta ka Yerusalem tur kaukum.

6 “Nanging tatkala titiang luas ka Kota Damsik, duk nampek ring kotane punika, sawetara tengai tepete, jeg saget wenten sinar galang pisan saking langite ngiterin titiang. 7 Irika titiang nyelempoh ka tanahe raris mirengin suara sane masabda sapuniki, ‘Saulus, Saulus! Ngudake cening nyiksa ?’

8 “Raris titiang matur sapuniki, ‘Duh Ratu, Sirake Iratu?’

“Suarane punika masabda sapuniki, ‘Nira ene Sang Hyang Yesus uli Nasaret ane siksa cening.’ 9 Anake sami sane sareng-sareng titiang nyingakin sinare punika, nanging ipun nenten ngresepang suarane sane masabda kapining titiang.

10 “Raris titiang matur malih sapuniki, ‘Duh Ratu Agung, napike sane sapatutne laksanayang titiang?’

“Sang Ratu Agung raris masabda malih sapuniki, ‘Bangun ja, tur luas ja ka Kota Damsik. Ditu cening bakal orahina saluirin ane musti laksanayang cening.’ 11 Duk punika titiang nenten mresidayang nyingakin napi-napi krana sinar sane kalintang galang punika. Punika mawinan anake sane sareng-sareng titiang ngamel tangan titiange tur nuntun titiang ngranjing ka Kota Damsik.

12 “Irika wenten adiri anak sane mapesengan Ananias. Dane anak sane satya nyalanang agama Yahudine. Makasami anak Yahudine sane meneng ring Kota Damsik ngajiang dane. 13 Dane Ananias ngrauhin titiang, tur ngadeg ring samping titiange saha mabaos sapuniki, ‘Duh jero Saulus, semeton titiange, nyingakin ja mangkin!’ Jeg saget titiang mresidayang nyingakin malih tur nganengneng dane.

14 “Raris dane Ananias mabaos kapining titiang sapuniki, ‘Sang Hyang Pengardi sane kasembah olih leluhur iragane sampun milih jerone mangda uning pikayunan Idane. Kenten pada, mangda jerone nyingak Sang Maha Patut, inggih punika Sang Hyang Yesus, lan mirengin sabdan Idane. 15 Jerone musti dados saksin Idane buat anake sami indik napi sane sampun cingakin lan pirengin jero. 16 Sane mangkin, napi malih sane antosang jero? Bangun ja! Serahang ja dewek jerone mangda kalukat dados tanda ngiring Sang Hyang Yesus tur kasuciang saking jerone saha ngamanggil parab Sang Hyang Yesuse.’”

Dane Paulus Musti Ngortiang Orti Rahayune kapining Bangsa Nenten Yahudi

17 “Sasampune paindikane punika, titiang mawali ka Kota Yerusalem. Risedek titiang mabakti ring Genah Agung Mabaktine, titiang nyingak pelawatan. 18 Duk punika, titiang nyingakin Sang Ratu Agung sane masabda sapuniki, ‘Enggalang ja cening magedi uli Yerusalem! Krana anake dini tusing bakal nerima kasaksian ceninge indik Nira.’

19 “Raris titiang matur sapuniki, ‘Duh Sang Ratu Agung! Sampunang ja! Pastika kasaksian titiange jagi katerima krana ipun sami uning titiang sampun ngranjing ring wantilane mangda ngejuk lan mecutin anake sane pracaya kapining Iratu. 20 Kenten pada ipun sami uning indik pademne dane Stepanus, inggih punika saksin Iratune. Titiang wenten irika tur setuju mangda dane kapademang. Turmaning titiang sane nyaga jubah anake sane ngamademang dane Stepanus.’

21 “Nanging Ida malih masabda sapuniki, ‘Luas ja! Krana Nira bakal ngutus cening ka tongos-tongos ane joh sid anake ane tusing Yahudi.’”

22 Anake akeh irika kari mirengin dane Paulus. Nanging tatkala dane nyeritayang indik dane luas sid anake sane nenten Yahudi, ipun sami majeritan sapuniki, “Matiang ja anake ento! Ia tusing patut idup!” 23 Ipun sami majeritan sambilanga ngambis jubahnyane praragan tur nyambehang buk menek.

24 Punika mawinan pemimpin pasukan Romane punika nunden mangda dane Paulus kabakta ka markase. Ipun pada nunden dane kapecutin lan kapreksa, mangda pemimpin pasukane uning napi mawinan anake akeh punika majeritan sekadi punika kapining dane Paulus. 25 Nanging sasampune kategul mangda kapecutin, dane Paulus mabaos kapining prawira Romawine sane ngadeg irika sapuniki, “Napike dados mecutin warga karajaan Roma sadereng kaadilin?”

26 Mirengin paindikane punika, prawirane tangkil ring pemimpin pasukane tur matur sapuniki, “Punapike mangkin? Iraga das nglanggar ukum Romane! Krana anake punika warga Roma!”

27 Raris pemimpine punika rauh ring dane Paulus tur mataken sapuniki, “Tegarang ja orahang teken tiang, apake yakti ragane warga karajaan Roma?”

Dane Paulus masaur sapuniki, “Inggih, titiang puniki warga Roma.”

28 Pemimpin pasukane malih mabaos sapuniki, “Tiang dadi warga karajaan Roma ulian tiang mayah liu sajan!”

Raris dane Paulus masaur sapuniki, “Nanging titiang mula saking lekad dados warga karajaan Roma.” 29 Irika raris para tentara sane jagi mecutin lan mreksa dane pada gelis makirig. Tur pemimpin pasukane punika dados jejeh krana ipun nunden negul dane Paulus sane sujatine warga karajaan Roma.

Dane Paulus ring Arepan Pengadilan Agama Yahudine

30 Benjangane, pemimpin pasukan Romane punika meled mangda yakti-yakti uning napi mawinan anak Yahudine melihang dane Paulus. Punika mawinan, pemimpin pasukane mrentahang para pemimpin rsine lan pemimpin pengadilan agamane mangda mapunduh. Irika dane Paulus kicen medal saking markase, raris kabakta ring arepan ipune sami.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”